बैतडी – सुर्नया गाउँपालिकाका उच्च क्षेत्रमा चिया खेतीको प्रारम्भिक सम्भाव्यता अध्ययन गरिएको छ।
बैतडीको सुर्नया गाउँपालिका वडा नं ५, ६ र ७ का उच्च क्षेत्रमा गरिएको यस अध्ययन नेपाल राष्ट्रिय चिया तथा कफी विकास बोर्डका चिया विकास अधिकृत गौरव लुइँटेलसहितको टोलीले सम्पन्न गरेको हो। गाउँपालिका अध्यक्ष अम्मरबहादुर कुँवरका अनुसार, चालु आर्थिक वर्षको नीति तथा कार्यक्रममा उच्च क्षेत्रमा चिया खेतीको सम्भाव्यता अध्ययन गर्ने कुरा उल्लेख गरिएको थियो। त्यसअनुसार प्राविधिक टोलीले तीन वडाका उच्च स्थानहरूमा प्रारम्भिक अध्ययन गरेको हो।
अध्ययन वडानुसार यस प्रकार भएको छ: वडा ५ को धुलिधार र रडीगाउँ, वडा ६ को धुलिधार, कलालपसे, जित्कीजुँवाड र मुसे, तथा वडा ७ को जित्कीजुँवाड र दाङल क्षेत्रमा। केही ठाउँमा स्थानीयहरूसँग छलफल गर्दै चिया खेतीको सम्भावनाबारे बहस गरिएको थियो भने केही ठाउँमा भौगोलिक अवस्थाको अध्ययन गरिएको थियो। टोलीले सम्भावित स्थानहरूको माटो परीक्षणका लागि नमुना संकलन गरेको छ र केही दिनभित्र प्रतिवेदन आउने बताइएको छ।
चिया खेती परिचालन तदर्थ समितिका संयोजक कृष्ण बिष्टका अनुसार, पहाडी क्षेत्रमा खेतीपाती छोडेर जमीन बाँझो रहेको अवस्थामा चिया खेती वैकल्पिक रूपमा फस्टाउन सक्ने सम्भाव्यता देखिएको छ। गाउँपालिका अध्यक्ष कुँवरले पनि प्रारम्भिक अध्ययन सकारात्मक रहेको उल्लेख गर्दै प्रतिवेदन आएपछि यसलाई अगाडि बढाउने रणनीति बनाइने बताए। बिष्टले चिया खेती सफल भएमा पर्यटकीय दृष्टिले पनि क्षेत्र महत्वपूर्ण बन्ने आशा व्यक्त गरेका छन्।
