बझाङ- बैतडीको पुर्चौडी नगरपालिका–७ बडूगाउँको मोडमा जन्ती बोकेको बस दुर्घटना हुँदा ज्यान गुमाएका सात जनाको पार्थिव शरीर आज एकै आँगनबाट अन्त्येष्टिका लागि उठाइएको छ। एउटै घरआँगनबाट सात शव उठ्दा गाउँभरि शोक र स्तब्धताको माहोल बनेको छ।
दुर्घटनामा १३ जनाको मृत्यु भएको थियो। तीमध्ये बझाङको बित्थडचिर गाउँपालिका–७ लगुणासाका नरेन्द्रराज जोशी, विष्णुदत्त जोशी, वसन्तराज जोशी, केशवराज जोशी, अशोकराज जोशी, किसनदत्त जोशी र विसनदत्त जोशीको आज एकै चिहानमा अन्त्येष्टि गरिँदै छ।
मृतकमध्ये नरेन्द्रराज जोशी र विष्णुदत्त जोशी सहोदर दाजुभाइ हुन्। नरेन्द्रराज बित्थडचिर–७ का वडा सचिव रहेका थिए भने विष्णुदत्त स्थानीय महादेव माध्यमिक विद्यालयमा अङ्ग्रेजी शिक्षक थिए। यस्तै, वसन्तराज जोशी नरेन्द्रराज र विष्णुदत्तका भतिजा हुन्।
दुर्घटनामा ज्यान गुमाउने केशवराज जोशी र अशोकराज जोशी बाबु–छोरा हुन्। केशवराजका एकमात्र छोरा अशोकराजको घटनास्थलमै मृत्यु भएको थियो।
यस्तै, गम्भीर घाइते भएका किसनदत्त जोशी र विसनदत्त जोशी पनि सहोदर दाजुभाइ हुन्। उनीहरूलाई उपचारका लागि डडेल्धुरा लैजाने क्रममा बाटोमै ज्यान गएको थियो।
एकैपटक सात जनाको मृत्यु र आज एकै चिहानमा अन्त्येष्टि हुन लाग्दा बझाङमा शोकको लहर फैलिएको छ। पीडित परिवारहरू शोकले थला परेका छन् भने स्थानीयवासीहरू ‘यो दुःखले अब गाउँ नै रित्तिएको’ प्रतिक्रिया दिइरहेका छन्।
